LAOAG CITY – Naikeddeng a mangipasango ti prosekusion ti International Criminal Court (ICC) ti lima a testigo iti panangusig iti kaso a crimes against humanity kontra ken ni dati a Presidente Rodrigo Duterte sakbay ti Christmas recess ti korte.
Inbatad ni Senior trial lawyer Julian Nicholls a manamnama a personal nga agtestigo iti The Hague dagiti testigo a naipaayan ti protective codes malaksid no maaddaan ti saan a ninamnama a problema iti panagsagsagana.
Mabalin a mangipaay dagitoy ti live testimony wenno agusar ti immunan a nakasurata rakurak maiyataday iti International Criminal Court rule 68.
Natalantan iti status conference ti panagusar ti prosekusion ti open-source materials pakairamanan ti sumurok-kumurang 1,000 a clipping dagiti pagwarnakan mainaig kadagiti pammapatay idiay Davao City idi Mayor pay laeng ni Duterte.
Kwinestioran ni presiding judge Joanna Korner no kasapulan nga iraman ti amin ti nasao a report iti opisial a rekord ti panangusig.
Depensa pay ni Nicholls, napateg dagiti dokumento gapu ta inukkon dagitoy idi panawen nga awan pay ti opisial nga ahensia a sistematiko nga agirekrekord kadagiti extrajudicial killing.
Kabayatanna, kuna ti defense team ni Duterte a limmabasen iti 18,000 nga item ti listaan ti ebidensia pakairamanan ti maysa a data set nga addaan ti 8,393 nga item manipud kadagiti operasion ti Philippine National Police manipud Hulio 2016 agingga Nobiembre 2017.
Ginutigot dagiti hues ti prosekusion a kissayan pay dagiti duplicate a dokumento tapno mapagtalinaed a nakasentro kadagiti napapateg nga ebidensia ti panangusig.
