Inbatad ti Department of Education (DepEd) iti budget hearing ti Senate Finance Committee nga agarup 23,000 a pagadalan iti pagilian ti awan ti principal-na gapu ta kaadoan kadagiti aplikante ket saanda a pasado iti qualifying exam.
Segun ken ni Education Secretary Sonny Angara, ad-adalen ti ahensia ti pannakaipalawa iti National Assessment for School Heads (NASH) tapno ad-ado ti principal a ma-hire ken maidutok kadagiti pagadalan.
Inlawlawagna a naipaayanen ti gundaway dagiti aplikante a saan a makapasa kadagiti nagduduma laeng a paset iti exam ken maipadalan iti remediation wenno professional development intervention imbes nga agulit manen iti baro nga exam.
Iti 2026, nakagun-od ti Department of Education (DepEd) ti 6,000 a posision para kadagiti principal ken napaiyalisto ti proseso ti panagala kadagiti aplikante ngem nupay kasta, bassit laeng dagiti nakapasa.
Segun ken ni DepEd Undersecretary Wilfredo Cabral, iti sumurok 45,000 a pagadala iti pagilian, adda laeng 22,000 ti adda principal-na kadagitoy.
Mainaig iti daytoy, madanagan met ni Senate President Sherwin Gatchalian ti kinaawan ti pondo para kadagiti baro a posision ti principal iti nailungalong a 2027 budget ti Department of Education (DepEd).
Impetteng ni Cabral a nagkiddaw ti ahensia ti pondo para iti nasurok 14,000 a kanayonan a posision iti 2027 ngem saan daytoy a naipaayan ti budget. Mapatta-patta a P10.5 bilyon ti kasapulan para kadagiti nasao a posision. Pakairamanan ditoy dagiti plano a solusion ti pannaka-promote wenno reclassification dagiti mangisursuro iti babaen ti pannakaipalawa ti career progression program.
