LAOAG CITY – Pinalen ti work stoppage order nga inpataw ti Department of Labor and Employment-National Capital Region (DOLE-NCR) iti innem a barko ti Atienza Shipping Lines kalpasan ti trahedia ti nauram a MV June Aster.
Segun ken ni Department of Labor and Employment-National Capital Region (DOLE-NCR) Regional Director Rio Buenafe, naduktalan iti inspeksion kadagiti barko ti kompania iti Navotas City ti kinaawan ti Occupational Safety and Health (OSH) program, dagiti safety officer ken emergency preparedness module.
Karaman dagitoy kadagiti panaglabsing iti safety standards a kasapulan a sungbatan ti kompania kalpasan ti insidente tio uram iti MV June Aster a nangitunda ti pannakatay ti 77 nga indibidual.
Gapu iti work stoppage order, saan pay laeng mabalin nga agbiahe dagiti innem a barko agingga saan pay nakorehir ti kompania dagiti nadakamat a kinaawan wenno kinakurang.
Nupay kasta, inpasigurado ni Buenafe nga agtultuloy ti panagbayad ti sueldo kadagiti mangmangged nupay saan pay agoperar dagiti barko.
Kabayatanna, inpaayan ti kompania ti sangapulo nga aldaw, agingga Oktubre 23 tapno sumurot ngem nu man saan da agtungpal ket mabalinda a patawan ti administrative penalty nga umabot iti P100,000.
Mainaig iti daytoy, nagballaag ti Department of Labor and Employment Secretary Francis Tolentino kadagiti shipping companies a naiget a suroten ti occupational safety standards tapno masigurado ti kinatalged dagiti tripulante ken dagiti pasahero.
