LAOAG CITY – Inakusaran ni Vice President Sara Duterte ti Macos administration iti panagusar dagiti alegasion kontra kenkuana mainaig iti isyu ti China-funded business ventures ken drug bust iti Laos, pakairamanan payen ti maipagarup a travel authority-na iti Laos, tapno ikkaten daytoy iti puesto.
Basar iti opisial a rakurak ti Office of the Vice President, inpeksa ti Bise Presidente ti sentimientona nga iramraman daytoy ti gobierno kadagiti kabaroan nga isyu tapno paruaren daytoy kas pangta ti nasional a seguridad gapu ta napaay a napaneknekan ti prosecution team ti Kamara dagiti alegasion kontra kenkuana.
Kwinestionaranna pay dagiti ebidensia iti likudan dagiti nadakamat nga akusasion ken inpaganetgetna nga awan ti mapanekneknan iti daytoy.
Nupay kasta, segun ken ni Duterte a “fabricated’ wenno ar-aramid laeng ti maipagarup a travel authority-na iti Laos, kalpasan ti panagwaras ti dokumento a nagbiahe daytoy iti Laos ken inawaganna a desperado dagitoy nga iraman daytoy iti Laos drug bust.
Innayonna pay nga inlibak ti Malacañang ti arig na nga awan pudnona ti maipagarup a naibaga a Laos travel authority ti opisina ti bise.
Kabayatanna, inlawlawag met ti Department of the Interior and Local Government nga awan koneksion ti pamilia Duterte iti nadakamat a drug bust iti Laos.
