Inbatad ni Dr. Teresita A. Tabaog, Regional Director ti Department of Science and Technology Ilocos Region, a kabaelan ti probisia ti mangpartuat ti asin iti intero a tawen nu laketdi mapasayaat ti teknolohiya tapno mapadakkel ken mapaalisto ti produksion.
Segun kenkuana, basar kadagiti report ket agarup 97% ti imported nga asin ket manipud iti sabali a pagilian.
Gapu iti daytoy, kinunana nga agtultuloy ti panagsukisok ti Department of Science and Technology (DOST) kangrunaan ti Salt Council ti teknolohia a makatulong a mapaalisto iti panagaramid ti asin.
Impettengna a babaen ti panagtitinnulong ti Department of Agriculture, Bureau of Fisheries and Aquatic Resources ken Department of Trade and Industry, nakitana ti panagngato ti produksyon ti asin ditoy rehion.
Kabayatanna, agtultuloy ti panangipaay ti Bureau of Fisheries and Aquatic Resources (BFAR) kadagiti nagduduma a tulong ken ramit kadagiti manggalap ken agar-aramid ti asin tapno ad-adda a mapapigsa ti nasao a produksion.
