Nabirokan ti maysa nga heat sealed transparent plastic sachet nga agdagsen ti 3.5 a gramo ti mapapati a shabu, iti sango ti pribado a kamposanto iti Brgy. 18, San Isidro iti ili ti Sarrat.
Nakita daytoy dagiti opisyal ti nasao a barangay iti mismo a sango wenno alad ti kamposanto bayat ti panagdalos da iti lugar.
Naamoan a nakaikabil iti plastic ti mapapati a shabu ken napandagan ti bato.
Inlawlawag ni Police Captain Ashley Cacayorin, Chief of Police ti ili ti Sarrat, a nag-request-da iti laboratory examination tapno makumpirmaran no pudno a shabu dagiti nabirokan iti kamposanto.
Patien ni Cacayorin a mabalin a planado ti panangikabil iti daytoy a pakete.
Malaksid iti daytoy, inbatadna a maibilang daytoy kas dead drop, maysa a wagas a saanen a direkta a makisinnarak wenno aginnawat ti seller ken buyer ti droga no di ket ibati lattan ti illegal a droga ti partikular a lugar ken mapan to alaenen ti pakaiturungan na nga indibidual.
Iti agdama, kitkitaen dagiti otoridad dagiti Closed-Circuit Television wenno CCTV kadagiti possible a nagdalanan dagiti suspek, gapu ta awan ti CCTV nga adda iti asideg a mismo iti nadakamat a kamposanto.
