Nangipila ti Office of the Ombudsman dagiti kaso a graft ken malversation iti Sandiganbayan kontra iti innem nga empleado ti Department of Public Works and Highways (DPWH) – Region XII ken pito a pribado nga indibidual mainaig iti maipagarup a P491.9 million a road right-of-way (RROW) scam iti General Santos City.
Pakairamanan kadagiti napilaan ti kaso ket da dati a Regional Director Subair Saro Diron ken dati nga Assistant Regional Director Laureano B. Suan Jr., kalpasan a nakakita ti Ombudsman ti umdas nga ebidensia para iti 18 counts ti malversation ken 18 counts ti panaglabsing iti Anti-Graft and Corrupt Practices Act.
Namunganay dagiti kaso iti panagtingiting ti National Bureau of Investigation mainaig ti bayar iti road right-of-way (RROW) iti 18 a lote para iti Digos-Makar National Road a maipagarup nga inusaran dagiti narepaso a peke a dokumento.
Basar iti rakurak ti witness a ni Roberto Catapang Jr., adda katulagan a napasamag ti padakkelem ti gatad ti pondo usar ti 2009 appraisal value kadagiti daga wenno lote a nagun-od pay idi paset ti dekada ’90.
Malaksid iti kaso a kriminal, inbilin pay ti ombudsman ti pannakaikkat iti serbisio ti dati a Legal Officer ti Department of Public Works and Highways (DPWH) – Region XII a ni Ansare Mariga Busran.
