Inbatad ni Engineer Shiela Marie Opelac, ti mangidadaulo ti City Agriculture Office nga addan ti makitkita da a problema ti suplay ti danom iti dayaen a paset ditoy siudad ti Laoag.
Daytoy ket gapu pay laeng iti mangrugrugi nga epekto ti El Niño.
Nupay kasta, inpasigurado na nga adda dagiti araramiden da nga addang tapno maliklikan ti nakarkaro pay nga epekto daytoy.
Kunana a karaman kadagiti addang da ket pakairamanan ti panangisayangkat da ti survey kadagiti water table ken ti panangpasayaat ti solar pump irrigation iti nagduduma a paset ti siudad.
Inlawlawagna a babaen dagitoy nga addang ket adda ti umdas a danom nga usaren dagiti mannalon.
Innayon na nga adda ti inaramid ti opisina da nga El Niño Preparation Mitigation Recovery Plan nga insumitir da iti City Disaster Risk Reduction Management Office (CDRRMO).
Naipalaon iti plano dagiti nagduduma nga aktibidad tapno maipadanon kadagiti umili dagiti wagas tapno maliklikan ti agbalin nga epekto ti El Niño.
Karaman pay ditoy ti pananggutigot da ti Climate Smart Agriculture, Drought Tolerant Varieties, ken panagmula kadagiti alternatibo a mula a saan unay nga agkasapulan ti ado a danom.
Malaksid iti daytoy, naipalaon pay iti plano ti rehabilitation and recovery no bilang kumaro ti agbalin nga epekto ti El Niño.
