Inarakurak ti Department of Health (DOH) a 35 porsiyento ti nagngatoan dagiti kaso ti influenza-like illness (ILI) manipod iti naudi a paset ti Setyembre agingga iti umuna a paset ti Oktubre, kalpasan ti naipagagangay a panagado dagiti kaso tunggal panagtutudo.
Basar iti datos, umaboten iti 13,321 dagiti kaso manipod Setyembre 24 agingga iti Oktubre 7, nangatngato no ikumpara iti 9,896 a nairekord manipod iti Setyembre 10 agingga iti 23.
Limmabes iti national alert threshold ti napagtitipon a bilang dagiti kaso idi morbidity week 39, manipod Setyembre 27 agingga iti Oktubre 3.
Gapu iti daytoy, napaigetan ti panagbantay iti 15 a probinsiya ken highly urbanized cities iti pito a rehiyon.
Kadakkelan a porsiento ti nagngatoan ti kaso ket nairekord iti Mimaropa, Western Visayas ken Central Visayas.
Nupay kasta, inbatad ti Department of Health nga agtalinaed a nababbaba iti maysa a porsiento ti case fatality rate.
Inbalakad ti ahensya a tapno maliklikan ti sakit ket masapol nga agugas ti ima, kaluban ti bigbig ken agong no aguyek wenno agbaeng, ken agsuot ti mask no addaan ti sintomas.
Ginutigot met ti ahensya dagiti adda iti vulnerable ken high-risk groups nga agpabakuna kontra iti influenza tapno makissayan ti risgo ti nakaro a sakit ken komplikasyon, ken kasta met a no makarikna kadagiti sintomas ket mapan agpakonsultar a dagus kadagiti YAKAP clinic ken health center.
