Inpasingked ni General Manager Perry Martinez iti Ilocos Norte Electric Cooperative nga awan ti gastos wenno maipasa a bayadan dagiti member consumers iti kuryente iti pannakapasilaw dagiti sumagmamano a kamposanto kadagiti nagduduma nga ili a nagkiddaw iti pannakapasilaw dagiti nadakamat a lugar.
Segun kenni Martinez, ti pannakapasilaw dagiti kamposanto ket paset ti programa ni Senador Imees Marcos a “Pasilaw” no sadinno a babaen ti opisina na ket maipaayan ti pondo ti pannakaikapet ti silaw kadagiti kamposanto.
Kunana a libre daytoy ngem nu kayat da nga ipermanente ket kasapulan nga agbayad da, ngem daytoy ket agpatingga laeng agingga intono Nobyembre 3 ken manamnama a malpas ti pannakaiplastar dagitoy intono bigat.
Naamoan a dagiti nadakamat a kamposanto ket pakairamanan iti Pasaleng public cemetery, Bacarra, Dingras, Burgos, dagiti kamposanto iti San Francisco ken San Marcelino iti ili ti Dingras, kasta pay ti Dingras Catholic cemetery, Veterans Memorial park, San Nicolas Aglipay cemetery, Camposanto de San Francisco Memorial park.
Mainaig iti daytoy, maladingitan ni Martinez gapu kadagiti negatibo a komento kontra iti senador nga agtultuloy a tumultulong iti INEC ken iti administrasyon na, rason a dakkel ti panagyaman na gapu ta naikkanen ti gundaway nga agsarita iti national babaen ti pannakaelektar na kas presidente ti Region 1 Electric Cooperatives Association 1.
Kabayatanna, inbatad na a saan a basol dagiti lokal a gobierno no apay nga awan ti silaw dagiti kamposanto, gapu ta no maikkan ti permanente a silaw ket masapol nga agbayad da.
Nupay kasta, kuna ni MArtinez a maibilang a corporate social responsibility da daytoy nga addang.
