Inbatad ni PMAJ Antonio Marzan Jr., ti pannakangiwat iti Ilocos Norte Police Provincial Office (INPPO) nga addan ti 16 a drug cleared municipalities ken maysa a siudad iti probinsia.
Daytoy ket kalpasan dagiti nagsasaruno a pannakatiliw ti sumagmamano nga indibidual ken dagiti opisial gapu iti iligal a droga.
Iti agdama, manarimaan ti panangasikaso da iti pito a lugar tapno madalusan manipud iti iligal a droga ken subject for deliberation dagitoy manipud iti regional office iti Philippine Drug Enforcement Agency (PDEA).
Segun ken ni PMAJ Marzan, manipud idi tawen a 2016 ket ikagkagumaan ti nailian a pulisya ti mangdalos ti iligal a droga ken inpanamnama da kadagiti umili a dagiti drug cleared nga ili ken siudad ket saanen a maapektaran ti droga babaen ti general intervention-da.
Kabayatanna, inlawlawagna met a ti operasion dagiti nagduduma a police station kas ti naiget a panangmonitor kadagiti drug personalities, maibilang man kas street level individual wenno high value individual, ket maysa nga addang da tapno malapdan ti panagraira ti iligal a droga.
