LAOAG CITY – Inpakammo ni Ms. Bernadette Abad ti Office of the Civil Defense Region 1 (OCD1) nga iti agdama, nakaiyetnag ti blue alert status ti Regional Disaster Risk Reduction and Management Council 1 para iti agtultuloy a panag-monitor iti manamnama panagsangpet ti publiko, pakairamnan dagiti mangiwayat ti aniaman a panagtitipon iti undas 2026.
Segun kenkuana, nakaipangaton iti blue alert status ti probinsia ti Ilocos Norte ken Pangasinan, idinto a red alert status met iti La Union gapu iti manamnama a La Union surfing break.
Kinunana a ti pannakaipangato iti red alert status iti probinsia ti La Union ket gapu iti manamnama a panagsangpet dagiti agkalikagum a pumasiar iti nasao a pag-surfingan.
Malaksid iti daytoy, manarimaan ti naiget a panagbantay ti ahensia kadagiti sementeryo ken kasta payen kadagiti kabaybayan gapu kadagiti manamnama a manggundaway iti napaut a bakasyon tapno makapagpasiar aglalo kadagiti pagdidigosan.
Gapu iti daytoy, inbatdna nga addan dagiti naka-deploy a personnel kadagiti nagduduma a sementeryo, kasta payen ti Lakbay Alalay ti Department of Public Works and Highways, Department of Transportation ken ti Philippine Coast Guard.
Inpettengna ng addan dagiti naikabil a tarpaulins, nakapaskil a hotlines, nakasagana nga emergency vehicles, kameng ti Philippine National Police ken dagiti health personnel kadagiti nagduduma a sementeryo ditoy rehiyon para kadagiti agkiddaw ti tulong medikal.
Kabayatanna, binalakadan ni Ms. Abad ti publiko a kadeggan ti undas, ket daytoy pay ti panawen ti risgo iti panagtaud ti uram, no sadinno kiddawna iti publiko ti saanda a panangibati kadagiti kandila a nakasindi gaputa mabalin dagitoy a pagtaudan ken mangitunda ti uram.
