Inpasigurado ti Samahan ng mga Magbabangus iti Pangasinan (SAMAPA) nga agtalinaed nga umdas ti suplay ti bangus iti probinsia agingga ti bulan ti Disiembre.
Segun ken ni SAMAPA President Christopher Aldo Sibayan, mapatta-patta a P170 agingga P180 iti kada kilo ti presio ti bangus iti agdama basar iti kinadakkel, kinadagsen ken kinaadu iti gatangen.
Inlawlawag ti opisial a nababbaba ti presio ti Manila gapu iti kinaadu ti apit manipud iti Bulacan ken Laguna nga addaan ti nababbaba a production cost.
Manamnama nga agpada to ti presio no malpas ti harvest season iti dadduma a probinsia kabayatan a ngimmato ti demad ita nga Undas gapu kadagiti bakasyonista.
Agtltuloy met ti napalawa a distribusion ti SAMAPA iti nagduduma a paset ti pagilian pakairamanan ti Navotas, Malabon ken Cagayan Region.
Mapatta-patta a gudwa ti apit iti Pangasinan ti maipatpatulod iti ruar ti probinsia kabayatan a ti nabatbati a gudwa ket nailatang para iti lokal a merkado.
