Mangiwayat ti imbestigasion ti National Bureau of Investigation (NBI) mainaig iti insidente ti panagibelleng ti Ahjay Paws Aftercare Crematorium ti 29 a natay nga aso ken pusa iti Bulacan.
Iti rakurak ni NBI Director Melvin Matibag, imbilinna dagiti sumagmamano nga NBI Division iti panangidaulo ti Environmental Crimes Division ken dagiti amin a regional offices iti CALABARZON ken Central Luzon para ti naan-anay nga imbestigasion.
Mainaig iti daytoy, agbalin a sentro ti imbestigasion iti posible a pannakaipila ti kaso nga estafa babaen ti Article 315 ti Revised Penal Code kalpasan nga agbayad ti cremation services dagiti pet owners a saan a naitungpal ti pet crematorium.
Kitaen met ti NBI ti business permits, equipment, CCTV footage ken proseso ti pannakaitalek iti pasilidad kadagiti natay a taraken da.
Kabayatanna, mangiwayat met ti inspeksion ti NBI kadagiti kapada a cremation services iti pannakitinnulong iti Department of the Interior and Local Government (DILG), Department of Environment and Natural Resources (DENR), Philippine National Police (PNP) ken local government units kageddan ti agbalin a rekomendsion ti Philippine Animal Welfare Society (PAWS).
