Mamati ni Department of the Interior and Local Government (DILG) Secretary Jonvic Remulla a senyales ti panagkapuy ti suplay ti shabu iti pagilian iti panagngato ti presyo na iti merkado.
Segun ken ni Remulla, manipod iti dati a P3,800 ti kada gramo idi 2022, umaboten iti agdama ti mapatta-patta a P6,800 ti presyo ti shabu.
Inbatad ti sekretaryo a mangipasimudaag daytoy a narigrigat ti panagala ti suplay ti illegal a droga.
Inrakurak daytoy ni Remulla iti presentasyon ti 200 kilo ti shabu a nakumpiskar dagiti otoridad iti Manila International Container Port (MICP) idi Oktubre 15.
Kuna ni Remulla, nanginngina iti agdama ti shabu no ikumpara idi 2022, a mangipaneknek a marigatan dagiti aglaklako a makaala ti suplay.
Nupay kasta, ti panagngato ti presyo ti illegal a droga ket saanna a kayat sawen a naan-anay a napukaw ti illegal a droga iti pagilian.
