LAOAG CITY – Kalikagum ti lokal a gobierno iti ili ti Banna a masalakniban ti salun-at dagiti umili manipud kadagiti nagduduma a klase ti kanser kangrunaana iti sakit a cervical cancer.
Segun ken ni Hon. Mary Chrislyn C. Abadilla, Mayor iti nasao nga ili a sipud idi tawen 2022 ket rinugiandan ti makunkuna a Banna S-H-I-E-L-D, wenno ti Strengthening HPV Immunization towards Elimination through Leadership Development Against Cervical Cancer Program.
Daytoy ket nakabasar iti kalikagum ti World Health Organization (WHO) a mabakunaan ti 90% nga ubbing a babbai nga agtawen ti 9 agingga 14 babaen ti bakuna kontra Human Papillomavirus (HPV).
Gapu iti nasao a programa, nagbalin ti ili ti Banna a kaunaan a nakagun-od ti 90% a target ti HPV vaccination kadagiti ubbing a babbai nga agtawen ti 9 agingga 14 iti intero a pagilian.
Malaksid kadagiti ubbing a babbai, rinugian payen ti nasao nga ili ti panangbakuna kadagiti ubbing a lallaki nga agtawen met ti 9 agingga 14.
Daytoy ket gaputa saan laeng a dagiti babbai ti mabalin a maapektaran iti HPV, no diketdi mabalin pay a maapektaran dagiti lallaki, a mabalin a mangpataud ti sumagmamano a klase ti kanser kas ti throat cancer.
Gapu iti daytoy, kalikagum ti lokal a gobierno iti ili ti Banna a maprotehiran dagiti ubbing a babbai ken lallaki manipud kadagiti sakit a kanser mainaig iti Human Papillomavirus HPV, babaen iti panangituloy ken panangipalawada ti programa a panagpabakuna.
