LAOAG CITY – Inrakurak ni Dr. Ramonito Baltazar, ti mangidadaulo ti Veterinary Office iti siudad ti Batac nga agtalined a zero case wenno awan ti kaso ti African Swine Fever wenno ASF iti nasao a siudad.
Segun kenkuana, daytoy ket babaen ti regular a panagbisitada kadagiti nagduduma a farms wenno pagtarakenan ti baboy iti siudad tapno agtultuloy nga ipaayan ti pammalagip dagiti hog raisers mainaig ti panangliklik iti nasao a sakit.
Pakairamanan kadagitoy a pammalagip ket kas koma ti regular a panagdalos, panag-disinfect, ken naiget a biosecurity kadagiti pagtarakenan ti baboy kangrunaan kadagiti naruay a pagdalyasatan dagiti tattao wenno luglugan tapno saan a maapektaran dagiti taraken a baboy.
Innayonna a masapol ti naiget a panagbantay kadagiti baby kangrunaan no adda rumrumuar a simtopas kas koma iti gurigor, saan a mangan wenno awan gaganaygayanna, ken ti kellaat a pannakatay.
Kunana a no adda dagiti nasao a simptomas ket insigida nga agturong iti opisinada para iti naan-anay a pannakaimbestigar ken pannakatamingna.
Kabayatanna, iti agdama, kunana a rumrumuar a kangrunaan a sakit kadagiti dingwen iti siudad ket ti panagrugit dagiti kalding, baka, ken dadduma pay.
