Ilunglungalong ni Senate President Sherwin Gatchalian ti insigida a panagbalin a linteg ti gakat a mangipawpawil kadagiti kabagyan dagiti opisial ti gobierno a makagun-od dagiti kontrata manipud iti gobierno.
Inpetteng ni Gatchalian ti kinapateg nga agbalin a linteg iti kabiitan a panawen ti Senate Bill No. 1962 wenno ri Government Contracting and Procurement Integrity Act tapno masigurado a mapan kadagiti programa a pagbenipisiaran ti publiko ti kuarta ti pagilian.
Innayonna pay a saan a rumbeng a mapan kadagiti kabagyan dagiti adda iti turay dagitio portunidad a ponpondoan dagiti umili.
Iti babaen ti akat, saan a mabalin a makagun-od ti government contracts dagiti kabagyan dagiti opisial a sakupen ti agingga fourth civil degree of consanguinity wenno affinity.
Pakairamanan ditoy dagiti nagannak, annak, kabsat, lolo ken lola, apoko, tito, tita, kaanakan, first cousins, dagiti katukad a kabagyan babaen ti kasar.
Karaman iti nagduduma a kontrata ti gobierno, pakairamanan ti panaggatang dagiti ramit ken serbisio, dagiti proyekto a pang-imprastraktura ken dadduma pay a katulagan a ponpondoan ti gobierno.
Gagem daytoy a lappedan ti panagusar ti puesto ken impluwensia dagiti opisial tapno maaddan ti saan a patas a kalamangan iti panagala dagiti kontrata ti gobierno.
Maipalagip nga inapbrubaran ti Senado iti maikalo ken maudi a pannakibasa ti Senate Bill No. 1962 idi Setiembre 2, 2026, iti botos a 15-0.
Nupay kasta, saan pay daytoy nagbalin a linteg ken kasapulan pay a dumalan kadagiti sumaruno nga addang iti proseso ti panangbalin a linteg sakbay daytoy a maipatungpal.
