LAOAG CITY – Inpakaammo ti Securities and Exchange Commission ditoy probinsia ti panagngato ti bilang dagiti saan nga otorisado nga investment scheme ditoy Ilocos Norte.
Segun ken ni Atty. Patricia Paola S. Rillon ti Securities and Exchange Comission Counsel 1 nga iti agdama, manarimaan ti panag-monitor-da kadagiti nasao nga investment scheme, no sadinno idi laeng kallabes, addan dagiti nauktalanda ken napatawanen ti pannusa babaen iti pagopisinaanda.
Pakaseknan iti daytoy, maysa kadagiti kangrunaan nga investment scheme a na-monitor-da ditoy probinsia ket dagiti saan nga otorisado nga agpapautang a dakkel ti interesna.
Inbatad ni Rillon a dagiti masansan nga agbalbalin a biktima ket dagiti Overseas Filipino Workers (OFW), dagiti senior citizens, health professionals ken dagiti estudiante.
Kinunana a ti makitkitana a rason ti pannakaluko dagiti agbalbalin a biktima ket ti kinakurang ti pannakaamoda no sadinno ti lehitimo a pangikabilanda iti kuartada.
