Kiniddaw ti defense team ni dati a Presidente Rodrigo Duterte iti International Criminal Court (ICC) nga ikkaten ti dua a testigo ti prosekusyon iti listaan na kalpasan nga inpetteng na a dagiti nagbalin a rakurak da ket naibasar laeng ti maipagarop a sayangguseng ken dagiti impormasyon a naala manipod iti media ken social media.
Iti maysa a redacted request filing a naiparuk-at idi Nobyembre 9, paik-ikkat ti abogado ni Duterte a ni Peter Haynes iti ICC Trial Chamber III dagiti testigo a nabigbig kas P-1334 at P-1348, no sadinno nga inbatad na a dagiti dua ket arigna awan iti Pilipinas idi panawen a nasakop ti Counts 2 ken 3 dagiti kaso.
Basar iti depensa, awan kadagiti dua a testigo ti addaan ti direkta a personal a makaammo iti nagbalin a desisyon ken operasyon idi panawen ti panangidaulo ti dati a presidente, partikular dagiti alegasyon mainaig ti maipagarop a killing quotas, financial rewards, ken target lists a mangikonkonektar ken ni Senador Ronald “Bato” dela Rosa.
Inpetteng ni Haynes a ti palawag dagiti testigo mainaig iti sumagmamano nga insidente ti pammapatay iti war on drugs ket naggapo laeng kadagiti nabasa iti pagiwarnak ken nangngeg iti istorya ti sabali a tao, isut gapuna nga awan ti umdas a probative value tapno usaren kontra iti kliyente na.
Naikeddeng a sangwen ni Duterte ti tallo a count ti crimes against humanity iti panangusig ti ICC a mangrugi intono Nobyembre 30, 2026, kabayatan nga awan pay ti inparuk-at a desisyon ti Trial Chamber III mainaig iti nasao a mosyon ti depensa.
