LAOAG CITY – Naipadalan iti emergency appendectomy wenno insigida nga operasyon ti appendix ni Miss Universe Philippines 2023 Michelle Marquez Dee kalpsan a makita nga adda ti abnormalidad iti resulta ti CT scan-na.
Nadiskubre dagiti doktor nga ado dagiti bato iti bara na iti paset ti appendix-na isut gapu na a masapol nga insigida a maikkat dagitoy, kageddan ti pammilin kenkuana iti doktor.
Mainaig iti daytoy, nakarikna ti nakaro a panagsakit ti buksit ni Dee kabayatan ti panagturong na iti mays a photoshoot kadwana ti fashion photographer a ni BJ Pascual.
Gapu iti daytoy, dagos a naitaray iti ospital ni Michelle tapno makita ti kasasaadna.
Kabayatanna, balligi a naiwayat ti operasion tapno maliklikan ti posible a panagputok ti appendix ken panagkaro ti impeksion.
Iti agdama, addan iti nasayaat a kasasaad ni Michelle ken manarimaan nga agin-inana idinto nga agtultuloy ti panag-monitor dagiti doktor.
