LAOAG CITY – Nagballaag ti Department of Education (DepEd) kadagiti mangisursuro a manggandat a mangilako wenno mangisalda kadagiti maibunong a laptop kadakuada.
Segun ken ni DepEd Secretary Sonny Angara, naiget ti panagballaag da tapno masigurado a saan a mausar iti iligal nga aktibidad wenno maaramat iti sabali a banag dagiti ibunongda a laptop.
Inaramid na daytoy kalpasan a rinugyanen ti nasao a Departamento ti agibunong ti 231,000 a laptops para kadagiti mangisursuro iti intero a pagilian.
Inpetteng ti Sekretario a saan a mabalin nga ilako dagiti nasao a laptop gapu ta kukua daytoy ti gobierno.
Kunana a tunggal pagadalan ket maaddaan ti property custodians a mangbantay iti imbentario ken tapno masigurado a mausar dagitoy iti naikeddeng a pakausaranna.
Immunan nga inpakaammo ti Department of Education a gimmatangda ti 231,725 a laptops tapno usaren dagiti mangisursuro.
Iti nasao a bilang, addaan ti 169,008 a MacBook Neo units kabayatan a 62,717 met ti Windows-based laptops.
Kabayatanna, malaksid kadagiti mangisursuro, makaawat pay dagiti administrative officers ti departamento ti 3,646 a MacBook Neo.
