LAOAG CITY – Nangiparuk-at ti pammilin ti Sandiganbayan ti 90 nga aldaw a preventive suspension kontra ken ni Leyte 1st District Representative Ferdinand Martin Romualdez mainaig kadagiti sangsangwen na a kaso iti anti-graft court.
Basar iti resolusion nga inparuk-at ti Sandiganbayan, ti preventive suspension ket nakabasar iti salinong ti Republic Act No. 3019 wenno ti Section 13 ti Anti-Graft and Corrupt Practices Act.
Nupay kasta, inlawlawag ti Sandiganbayan a ti nasao a suspension ket saan a pannusa wenno pinal a sentensia iti sangsangoen ni Romualdez a kaso, no di ket daytoy ket maysa a probision iti paglintegan tapno masigurado a saan nga aramaten ti siasinnoman nga opisial ti posision na kabayatan ti panagdenggeg iti kaso na.
Iti salinong ti nasao a pammilin, temporario a mapawilan ni Romualdez nga ipatungpal dagiti responsibilidad na kas mangibagi ti Leyte ken dagiti dadduma pay nga opisial a transaksion iti opisinana kas kongresista iti uneg ti tallo a bolan.
Kabayatanna, inbatad ti kampo ti agpanpanday linteg a respetaren da iti proseso ti paglintegan.
Iti baet daytoy, inpanamnama ti kampo ni Romualdez ti panangipilada ti motion for reconsideration mainaig iti nasao a direktiba ti Sandiganbayan.
