Inpetteng ni Mr. Niño Oconer, Secretary-General, La Union Peace and Justice Advocates, a ti ar-aramiden ti administrasyon ni Presidente Ferdinand Marcos Jr. a panagsagsagana para iti maisayangkat nga ASEAN summit iti pagilian ket maibilang kas “imeldific” wenno nalabes unay ti kinagarbo na.
Inpalgak na a ti araramiden ti presidente ket mangitultuloy ti tradisyon ti pamilya na a panagbalin a nagarbo.
Inbatad na nga imbes a solusyunan ti problema dagiti umili ket nagikabil ti gobierno kadagiti barikada ken tarpaulin tapno maserraan ken mailemmeng dagiti basura ken pagnanaedan dagiti informal settlers.
Inpaganetget pay ni Oconer a ti gagem ti gobierno ket ilemmeng kadagiti nagduduma a lider a makipaset iti ASEAN summit ti mapasparan a nakaro a kinarigat iti pagilian.
Innayon na a dagiti pondo a nausar iti pannakailemmeng ti pudno a sitwasyon iti pagilian ket isu dagiti naikissay iti pondo a para koma iti agrikultura, edukasyon ken dadduma pay a serbisyo a para koma kadagiti umili.
