Manamnama a makaawat ti P50 million iti city government of Laoag a mausar iti pannakapasayaat ti Laoag City Public Market.
Segun ken ni Mayor James Bryan Alcid, maragsakan daytoy gapu ta kalpasan ti agarup 30 a tawen ket maurnos ken mapapintas ti Laoag City Public Market and Commercial Complex babaen iti administrasion na.
Kunana a ti pondo ket tulong ken suporta ti National Government a Local Government Support Fund (LGSF) a kangrunaan a gagem ti mangtulong ti maysa a local government units (LGU) kas ti Laoag City para ti nayon a pannakaimplementar dagiti nadumaduma a proyekto ken programa.
Inbatad na nga ti national government ti mangipaay ti kontraktor ken adda ti manamanama a maisayangkat a pre-assesment ti nasao a pasdek sakbay ti pormal a pannakarugi iti renovation iti nadakamat a merkado publiko.
Mainaig iti daytoy, kangrunaan a target a mapapintas ti tiendaan ket ti water ken eletrical system, bobeda, nadumaduma a puesto, pannakapatibker ti pasdek tapno ad-adda a nasalsaluad ti tiendaan para kadagiti agtagilako ken umili.
Innayon na a napateg daytoy gapu ta maibilang ti tiendaan kas maysa kadagiti kangrunaan nga economic enterprise ti siudad ket dakkel a tulong ti ekonomia ti siudad ken pannakasaluad dagiti umili iti pannakapasayaat na.
Immunan iti daytoy, inpasingked ni Mayor Alcid a saan a marebba ken maiyakar ti tiendaan no di ketdi, maurnos ken mapasayaat a nalaing.
Inkiddaw na kadagiti agtagilako ken umili iti panagan-anus pay laeng bayat a manarimaan ti pannakaurnos ti pasdek.
