LAOAG CITY – Naduktalan a dati a drug surenderee ken adda ti problema iti panagpanpanunotna ti maysa a mannalon a naarestar kalpasan a maipagarop a pinaputukan na dagiti uppat nga indibidual iti ili ti Banna.
Daytoy ti kinumpirmaran ni PMAJ Exequiel Giovanni L. Doloroso ti Municipal Police Station iti ili ti Banna.
Mainaig iti daytoy, kinunana nga iti agdama, manarimaanen ti pannakaisagsagana ti pannakaipila ti kaso kontra iti suspek.
Immunan iti daytoy, naarestar ti nasao a suspek iti a maipagarop a pinaputukan na usar ti M16 rifle dagiti uppat nga indibidwal a pakairamanan ti tallo a menor de edad iti Brgy. 11, Catagtaguen iti ili ti Banna.
Ti suspek ket agtawen ti 45, mannalon ken residente iti Brgy. Sto Niño iti ili ti Nueva Era.
Basar iti Philippine National Police iti ili ti Banna, nakaawat da ti tawag iti oras ti alas-5:51 ti malem idi kalman, Nobyembre 12 mainaig iti kaadda ti nagpaputok ti paltog iti dalan nga agturong iti sitio Caldaan, Brgy. 11, Catagtaguen iti nasao nga ili.
Basar iti imbestigasyon dagiti otoridad, nakalugan ti bukod a motorsiklo dagiti biktima idi maipagarop a kellaat lattan a pinaputukan ida ti suspek apaman a nalabsan da ti rangtay iti lugar, ngem nagasat gapu ta awan ti natamaan kadagitoy.
Iti panagresponde dagiti otoridad ket naarestar da ti suspek ken nakumpiskar da ti maysa nga unit ti M16 rifle nga addaan ti magazine nga addan ti uppat a bala, maysa pay a magazine ti cal.5.56 rifle nga adda nagyan na a tallo a bala ken maysa a fired cartridge case para iti cal.5.56
