Maragsakan ti maysa kadagiti nagidonar ti dara kabayatan ti pannakaisayangkat ti Dugong Bombo 2026 a programa iti Bombo Radyo Philippines iti Laoag City Auditorium idi Kalman, aldaw ti Sabado, Nobiembre 14, 2026.
Inbatad ni Mr. Eloterio J. Duatin, agtawen ti 65, residente iti Brgy. Puttaw iti ili ti Solsona, daytoyen ti maika-12 a gundaway a nagdonar ti dara para iti blood letting activity ti Bombo Radyo Philippines a Dugong Bombo “A little pain, a life to gain”.
Nupay kasta, kuna na nga ita a tawen ti maudin a panagdonar na ti dara gapu ta agtawenen ti 65.
Napalaos ti ragsakna iti baet a saanen a kwalipikado nga agdonar iti dara intono sumaruno a bloodletting ket nalag-an ti riknana gapu ta ado metten dagiti naipaay na a dara a mabalin a nakatulong iti sumagmamano a biag.
Mainaig iti daytoy, kunana a ti kangrunàan a rason no apay a sinerrek na ti agidonar ti dara ket kalikagum na ti tumulong kadagiti agkasapulan ken paset payen ti panagsagsaganana no addan to ti agkasapulan ti dara a kameng ti pamilia na.
Inpakaammo na a kabayatan ti panagidonar na ti dara ket limmag-an ti pammagi ken ti salun-at na.
Kabayatanna, ginutigot na dagiti umili a padasenda iti agdonar gapu ta makatulong daytoy iti maysa aginggana ti tallo nga indibidual, mapapintas ti salun-at ken makapabang-ar ti rikna.
