LAOAG CITY – Imbasura ti maysa a federal court iti Estados Unidos ti napaiget a visa regulations ti administrasion ni US President Donald Trump a manglimita iti panagtalinaed dagiti gangannaet nga estudiante, researcher, ken journalists iti pagilian.

Mainaig iti daytoy inbatad ni US District Judge F. Dennis Saylor IV iti Massachusetts a saan a maiyataday iti linteg I baro a pagalagadan ti Department of Homeland Security (DHS).

Iti babaen ti naibasura a regulasion, mapalubosan laeng koma agingga uppat a tawen ti panagtalinaed dagiti international student iti Estados Unidos ken agaplikar ti pannakaiyalud-od ti panagtalinaedda no kalikagom da pay ti agadal.

Para met kadagiti gangannaet a journalists, agingga laeng koma iti 240 nga aldaw wenno sumurok kumurang 8 a bolan ti panagtalinaed da, idinto ta 90 nga aldaw para kadagiti Chinese journalists, nga adda posibilidad na nga agpaiyalud-od.

Basar iti korte, imbasura da daytoy gapu ta saan a nainkalintegan ken saan nga umdas ti rason ti DHS mainaig iti national security ken immigration fraud iti nasao a restrictions.