Kinumpirmaran ni Atty. Rolando Paruli Jr. iti National Bureau of Investigation Pampanga District Office (NBI-PAMDO) ti pannakaarestar da ti tallo a Malaysian nationals manipod iti maysa nga scam hub iti ili ti Currimao.

Kuna na nga adda ti 11 a babbai manipod iti nagduduma a lugar ditoy Pilipinas a naisalakan da iti panangisayangkat da ti rescue operation.

Inlawlawag na a sakbay ti operasyon da ket nakaawat da ti report nga agpatpatulong ti partner ti maysa kadagiti biktima gapu ta saan a kayat a pagawiden ti pagtrabahoan na ken umabot iti 18 nga oras nga agtrabtrabaho.

Inbatad na nga apaman a naestablisar da ti lokasyon ti pagtrabahoan ti partner ti nagreklamo ket nakikoordinar da a dagus iti National Bureau of Investigation – Central Luzon, NBI-Pampanga-District Office ken NBI ditoy ciudad ti Laoag para iti panangisayangkat da ti rescue operation.

Inpakaammo na nga iti panangisayangkat da ti rescue operation ket naduktalan da nga adda pay dagiti dadduma a babbai a pinilit dagiti gangannaet nga agtrabaho kas scammer.

Segun ken ni Atty. Paruli, agpangpanggap dagiti tallo a Malaysian nationals kas Federal Bureau of Investigation agents idinto a dagiti babbai isuda ti babaunen da nga agtawag kadagiti American citizens a target da a biktimaen.

Kuna ni Paruli, ti modus nga ar-aramiden dagiti suspek ket patawagan da kadagiti biktima dagiti US citizens tapno ipakaammo a napukaw ti Identification card da ken maipagarop a maus-usar iti fraudulent transaction ken im-imbestigaren dagitoyen ti Federal Bureau of Investigation, no sadinno a kasarita da dagitoy nga i-refer iti maysa nga ahente ti FBI tapno maurnus daytoy, ken no umannugot dagiti target da a biktimaen ket ditoyen a dumawat da ti kwarta.

Immunan nga inlawlawag ni Paruli a nagaplikar kas virtual assistant dagiti biktima babaen iti online post iti social media ngem idi nakadanun da iti lugar a naibaga a pagtrabahoan da ket sabali metten ti naipaaramid kadakuada.

Naamoan a saan a nakapanaw dagiti biktima iti scam hub gapu ta innala dagiti gangannaet dagiti wallet, Identification Cards ken ipawil da pay nga agusar da ti cellphone.

Karaman kadagiti naisalakan a biktima ket aggapo pay iti Davao, Nueva Ecija, Cavite ken Aklan.

Iti agdama, inpakaammo ni Paruli a napilaan dan ti kaso dagiti tallo a gangannaet ken nagtalinaed dagitoy iti National Bureau of Investigation ditoy ciudad ti Laoag, idinto a dagiti biktima ket inikkan da ti plete da tapno makaawid dan iti bukod da a lugar.