LAOAG CITY – Kinumpirmaran ni Presidente Ferdinand Marcos Jr. a saan a karaman iti panagbisita ni United States President Donald Trump ti panagpirma iti katulagan mainaig ti US-led Pax Silica Initiative.

Sungbat na daytoy kalpasan a sinaludsud dagiti kameng ti media no adda ti naikeddeng a panagpirma ti maysa a framework agreement para iti nasao nga inisyatiba.

Immunan nga inbatad ni US Ambassador to the Philippines Lee Lipton nga awan ti mapirmaan a katulagan.

Sinegundaan met daytoy ni Presidente Marcos Jr. ken inlawlawag na a saan a karaman ti Pax Silica kadagiti pagsaritaan da iti panagtaripnong da ken ni Presidente Trump, ngem saanna a kayat a sawen a naan-anayen a naibasura ti nasao a banag.

Maipalagip nga inbatad ni Department of Trade and Industry Undersecretary Ceferino Rodolfo a target da a mapirmaan ti legal framework ti Pax Silica sakbay ti tawen 2026.

Gagem ti nasao nga inisyatiba a papigsaen ti supply chain para iti napapateg a teknolohiya kas ti semiconductors ken artificial intelligence.