LAOAG CITY – Impasingked ni P/Capt. Kester Arellano, nga adda ti agarup 320 nga uniformed personnel ti mai-deploy kabayatan ti panagsagsagana para iti naindaklan a Viva Cristo Rey 2026 a maisayangkat iti Barangay Poblacion iti ili ti Nueva Era.
Daytoy ket pakairamanan dagiti Philippine National Police (PNP) Nueva Era, Armed Forces of the Philippines (AFP), ken Bureau of Fire Protection (BFP).
Inlawlawagna nga adda dagiti naiyuswat a panagtataripnong da kadagiti Chief of Police ti Philippine National Police (PNP) manipod iti kabangibang nga ili tapno masigurado ti seguridad dagiti naruay a tattao nga agatendar.
Kangrunaan a napagsaritaan iti taripnong da ket iti entrance ken exit point kadagiti ili ti Pinili, Dingras, Banna, ken iti Solsona.
Segun kenkuana, addan dagiti naibunong a signage a suroten wenno senyales dagiti deboto para iti maiyuswat a libot.
Inbatadna nga adda pay ti naaramid a panagbisita ti Ilocos Norte Police Provincial Office (INPPO) tapno siguradoen nga umdas dagiti parking space ken ti pakabuklan a seguridad iti lugar.
Mainaig iti daytoy, kunana nga addanto ti maipaay a Project Polseras para kadagiti ubbing tapno nalaka da laeng a mailasin no bilang maiyaw-awan dagitoy.
Kabayatanna, binalakadan ni Arellano dagiti deboto a saanen nga agisuot ti ado nga alahas tapno maliklikan ti panagtatakaw ken agturong ti nasapa iti nasao nga ili tapno maliklikan ti nakaro nga epekto ti trapiko.











