LAOAG CITY – Inbatad ni Mrs. Loelyn Acain, ti City Treasurer’s Office, a maminsan ti maysa a tawen ti panangiyuswat da ti calibration kadagiti dispensing machine dagiti gasolinaan.

Daytoy ket tapno masigurado nga umno ti rukod ti tunggal litro tj gasolina a maawat dagiti aggatang.

Segun ken Acain, gagem daytoy a nasigurado a maiyataday iti ibaybayad dagiti motorista ti eksakto a kinaado ti gasolina a maala da.

Inlawlawagna a manipod nangiwayatda ti monitoring ket awan pay ti nakitaan da ti problema iti calibration kadagiti dispensing machine kadagiti gasolinaan.

Innayonna nga iti agdama, nag-procure ti ahensia ti baro a calibration machine tapno masigurado a baro ken maiyataday iti agdama a sistema dagiti gasolinaan ti ramit nga usarenda iti panangiwayat ti calibration.