LAOAG CITY – Nagballaag ni PCol. Frederick E. Obar, Acting Provincial Director ti Ilocos Norte Police Provincial Office a masapol nga ag-alerto ti publiko nangruna kadagiti makaaw-awat ti text message wenno tawag a mausar ti nagan na.
Segun iti Ilocos Norte Police Provincial Office, adda ti mangus-usar iti nagan ni PCol. Obar tapno agdawat ti gatad ken dadduma pay a serbisyo nga idi-diaya ti Police Provincial Office.
Namunganay daytoy kalpasan nga adda maysa nga ili ditoy probinsya a mangus-usar iti nagan ti Provincial Director.
Gapu iti daytoy ket inpakdaar ti opisina da a no adda maawat a text message wenno tawag nga agdawat ti kuarta ket makikoordinar laeng kadagiti kaasitgan a lokal a gobierno wenno kadagiti opisina ti pulisya.
