LAOAG CITY – Kinumpirmaran ni Bombo International News Correspondent Hector Baytec idiay Canada nga ado ti maluksaw ken malidayan iti pannakaitantan manen ti panaglukat ti land border da iti Estados Unidos.
Segun kenni Baytec, daytoy ket kalpasan nga inrakurak ni Public Safety Minister Bill Blair ti pannakaiyalud-od ti panagrikep ti border agingga intono Hulyo 21 a nangrugi idi Marso 20.
Inlawlawag na a basar met kenni Prime Minister Justin Trudeau a nupay adon dagiti maibilang a fully vaccinated kadagiti dua a pagilyan, saan pay a nagund-od ti Canada ti herd immunity.
Naamoan a 66 a porsiento pay laeng a Canadians ti nakaawat ti ummuna a dose manipud iti 75 a porsiento a target ken 17 a porsiento ti nakakumpleton iti bakuna manipud met iti target nga agarop 20 a porsiento.
Inbatad na a ti Canada ket agdepdependar met laeng iti maited nga aggapo iti Estados Unidos ken Europe ken iti agdama ket adon ti agsangpet a bakuna ken adda pay dagiti sumagmamano a pakulo tapno magutigot dagiti tattao nga agpabakuna.
