LAOAG CITY – Inbatad ni Mr. Alfonso delos Reyes, Information Officer iti LGU-Solsona nga umabot iti agarop 1,500 a baboy ti dimmalan iti culling wenno napapatay gapo iti African Swine Fever (ASF).
Segun kenni delos Reyes, dagiti napapatay a baboy ket aggapo iti 500 meter radius manipud iti lugar a nakaduktalan ti baboy a positibo iti ASF.
Pakairamanan ditoy ti Barangay Manalpac, Juan, Lipay, Maananteng ken Catangraran iti nasao nga ili ken kada barangay ket adda ti burial site wenno lugar a nadeterminar a pakaitabonan dagiti baboy.
Mainaig iti daytoy, kuna ni delos Reyes a sursuruten da ti guidelines ti Dept. of Agriculture mainaig iti panangikali iti mismo nga uneg met laeng ti 500 meter radius dagiti napapatay a baboy gapo iti African Swine Fever (ASF).
Inlawlawag ni Delos Reyes a daytoy ket kas panangprebentar iti posible nga ad-adda a panagwaras ti ASF.
Kunana a saan a mabalin a maibyahe pay iti sabali a lugar dagiti maisakripisyo a baboy wenno dagiti adda iti uneg ti 500 meter radius gapo ta posible a makaapektar ti isbo wenno rugit dagitoy a mangitunda ti panagwaras ti ASF.
Gapo iti daytoy, nasken nga iti uneg met laeng iti 500 meter radius ti pakaitabonan dagitoy iti kauneg nga 10 a metro.
Inpetteng na a kalikagom da a saan a maapektaran dagiti adda iti ruwar ti 500 meter radius.
Mangnamnama daytoy nga awanen ti agpositibo iti ASF ti ili da ken ditoy Ilocos Norte.
