LAOAG CITY – Inpakaammo ni P/Col. Joemar Labiano, Provincial Director ti Ilocos Norte Police Provincial Office nga adda ti agarup 1,200 a pulis iti intero a probinsia ti naiwaras kagiddan iti umuna nga aldaw ti klase dagiti estudiante.
Segun kenkuana, nagbalin a naannayas iti panangipaay ti seguridad dagiti estudiante apaman a simrek dagitoy kadagiti pagadalan ditoy siudad ti Laoag ken dadduma pay nga ili ditoy probinsia.
Inbatadna a nakadawyanen ti kapulisan a bayabayan dagiti estudiante a sumrek kadagiti pagadalan nangruna no madanon ti panaglukat ti klase.
Inlawlawagna nga awan met ti nairekord nga aniaman nga insidente kabayatan iti umuna nga aldaw iti panagserrek dagiti estudiante kadagiti pagadalan.
Mainaig iti daytoy, kuna ni Mr. Jerry Carreon, School Principal IV ti Ilocos Norte National High School a kabayatan a maisursurat daytoy a damag ket addan ti pakabuklan a 4,405 nga enrollees ti simrek iti nasao a pagadalan.
Inpasingkedna nga adda ti umdas a classroom nga usaren dagiti agad-adal iti baet ti kinaadu ti bilang dagiti estudiante.
Kunana a kalikagumda a mapagbalin ti pagadalan kas premiere school of the North ken mangnamnama ti ad-adu pay a pammadayaw a magun-odda ita a tawen.
Inpasiguradona a maipatungpal ti trimester ita nga School Year 2026-2027 kas maiyataday iti pammilin ti Department of Education.
Kabayatanna, inbatad ni Mrs. Sherly Agsunod, School Principal IV ti Ilocos Norte National High School nga addan ti sumurok maysa a ribu nga estudiante ti naka-enroll iti nasao a pagadalan.
Kunana nga agtultuloy latta ti enrollment iti pagadalanda agingga inton Hunio 11.
Innayonna nga ad-adu ti bilang dagiti enrollees ita a tawen no idasig iti napalabas a tawen.
