LAOAG CITY – Naruay a bala ti nadiskubre dagiti mannalon iti Sitio Bangalan iti Brgy. Estancia iti ili ti Piddig.
Segun ken ni PLt. Rudy James Jacalne, naireport iti kapulisan idi kalman ti pannakakita kadagiti bala bayat ti panagkali dagiti mannalon iti tambak para iti panangisagana ti padanom iti pagmulaan ti tarong.
Kuna na a dagus a nagresponde ti kapulisan ken timmulong iti panagkali ngem saan a nalpas rason a naituloy itay bigat kadua da ti EOD ti iti Ilocos Norte Police Provincial Office.
Inbatad na nga agarup 300 a bala iti nagduduma ken nangatngato a kalibre ti paltog dagiti nakali da ken amin dagitoy ket aglatlati.
Mainaig iti daytoy, inpakaammo ni PLt. Singrid Caccam, ti mangidadaulo iti EOD team ti INPPO a sumagmamano kadagiti bala ket para iti 50 calibre machine gun, anti aircraft gun idinto a ti dadduma ket saan pay a madeterminar ngem mabalin pay laeng a bumtak dagitoy.
Kuna ni Caccam a dagiti bala ket aglatlatin ken mapatta-patta a naikali idi Word War II.
Nagtalinaed iti posisyon da dagiti nakali a bala ken manamnama a maipan iti Capaz, Tarlac iti umno a disposal process.
Nagpalagip ti opisyal iti publiko a nu bilang adda dagiti maduktalan a pagpabettak wenno bala ket dagus nga ireport iti kapulisan ken saan a garawen tapno maliklikan ti posible a panagbettak dagitoy.
Naamoan a ti nakaduktalan kadagiti bala ket dati a turod ken napagbalin laeng a talon.
