LAOAG CITY – Inrakurak ti Department of Justice a naipadalanen iti Witness Protection Program ti agasawa nga isuda Curlee ken Sara Discaya pakairamanan dagiti sumagmamano a dati nga opisial ti Department of Public Works and Highways.
Kinumpirmaran mismo daytoy ni Justice Secretary Jesus Crispin ‘Boying’ Remulla kagiddan ti panagbisita dagitoy iti opisinada.
Inbatadna a malaksid iti agasawa a Discaya pakairamanan ditoy da dati a Department of Public Works and Highways Bulacan 1st District Engineer Henry Alcantara, Brice Hernandez ken Jaypee Mendoza.
Inlawlawag ni Remulla a mabilang kas ‘protected witnesses’ dagiti nadakamat nga indibidual.
Kunana a nangipatulodda ti surat ken ni Senate President Vicente ‘Tito’ Sotto III tapno maipakaammo ti mainaig iti daytoy a banag.
Nupay kasta, inpettengna a daytoy nga addang ket tapno ad-adda pay a makaalada ti naan-anay nga impormasion.
Kabayatanna, simmangpet ni dati a Department of Public Works and Highways assistant district engineer Brice Hernandez iti Department of Justice nga intugotna ti CPU-na a tiningiting ti ahensia tapno makatulong iti panagtalidtid ti imbestigasion.
