LAOAG CITY – Inbatad ni Department of Social Welfare and Development (DSWD) Secretary Rex Gatchalian a naestablisar dagiti social worker nga adda ti discernment wenno naan-anay a pannakaawat kadagiti inaramid na ti agtawen ti 15 a suspek ti pammaltog iti maysa a pagadalan iti Tacloban City a nakatayan ti tallo nga estudyante.
Kunana a ti assessment ket maisumitir iti korte nga isu ti agdesisyon no awaten na kas pagibasaran ti iti kaso.
Iyur-uray met ti Department of Social Welfare and Development (DSWD) ti resulta ti psychological assessment iti agtawen ti 15 ken agtawen ti 14 a suspek tapno makabukel ti maiyannatop nga intervention program.
Immunan a nagpila ti kaso criminal dagiti otoridad kontra iti agtawen ti 15 a suspek, idinto nga exempted met iti criminal liability ti agtawen ti 14 iti babaen ti Juvenile Justice and Welfare Act.
Agpada dagiti suspek a menor de edad nga adda iti Regional Rehabilitation Center for Youth.
Mainaig iti daytoy, inrakurak ni Gatchalian a nakasagana ti Department of Social Welfare and Development (DSWD) a makipaset iti pannakatratar iti nailungalong a maipababa ti tawen ti criminal liability.
Kuna na a napateg a tingitingen a naimbag no kasapulan nga amendaran ti linteg wenno ti problema ket adda iti implementasyon na, aglalo iti baet dagiti baro a karit kas ti internet, bullying, ken dadduma pay a risk factors.
