LAOAG CITY – Agtultuloy ti napintas a kanpania ni Pinay tennis star Alex Eala iti 2026 US Open kalpasan ti maikadua a balligi a nagun-odna ken immabante iti Round of 32 iti torneo.
Kalpasan nga inabakna ni Mary Stoiana iti umuna a round iti straight sets iti score a 6-1, 6-2 ket inpakita manen ni Eala ti laingna manipud idi inatiwna ni Ukrainian Oleksandra Oliynykova iti score a 6-1, 6-4, iti second round.
Gapu iti daytoy, agtultuloy ti panag-abante ni Eala iti naisangsangayan a Grand Slam tournament ken maysa a kabaroan a laban ti sangoenna iti sumaruno a round.
Kabinnalubal ni Eala iti round of 32 ti pagayamna a ni Iva Jovic, iti agdama a world no. 14
Maisayangkat ti laban iti Arthur Ashe Stadium, ti kadakkelan a tennis stadium iti intero a lubong nga adda kapasidadna a sumurok-kumurang 23,000 nga audience.
Naikeddeng inton Setiembre 6, iti oras ti Pilipinas, ti panagbinnalubal ni Eala ken Jovic iti alas-7 ti bigat.
Tugot ni Eala ti momentum manipud iti dua a daras aballigi kabayatan a targetna nga ituloy ti pakasaritaan a kanpaniana para iti pagilian iti US Open.
