LAOAG CITY – Sumubsubbot ti maysa nga ama a ni Mr. Alfredo Taburada kadagiti annakna kadagiti tawen nga awan isuna iti dennada.
Gapu iti daytoy, inpakaammo ni Mr. Taburada nga inaldaw a mapanna itulod ti anakna a ni Johnjacob iti Mariano Marcos State University – College of Teacher Education babaen iti panagbisikleta.
Inbatadna a gapu ta narigat a makasada ti lugan iti lugarda ket napanunotanna nga inaldaw nga itulod dagiti annakna iti pagadalan.
Inlawlawagna a daytoy ket maysa a wagas iti panangipasimudaag iti sakripisio ken ayat ti maysa a nagannak ken ama nga aramidenna amin ti kabaelanna tapno saan nga agsardeng iti panagadal dagiti annakna.
Mainaig iti daytoy, inpalgak ni Johnjacob a narigat ti agbiag nga awan iti denna ti maysa nga ama nangruna idi adda iti pagbalodan ti amana.
Kunana a sipod idi naibalod ti amana ket arig kankanayon nga adda ti kurang iti biagda isu nga apaman a rimmuar ti amana iti pagbalodan kalpasan ti agarup lima a tawen ket maiyarig a saandan a mapagsina nga agama kas panangsupusop metten kadagiti oras nga awan ti amana iti sibayna.
Naammoan a naibalod ti ama ni Johnjacob kalpasan a maipagarup a napabasol isuna a nangrames banag nga awan ti kinapudnona.
Maipalagip a napagsasaritaan dagiti agama iti lubong ti social media kalpasan nga adu ti nangdayaw ken nasagid ti pusona iti panangitulod ti ama iti anakna a mapan agbasa usar laeng ti bisikleta.
Kabayatanna, iti agdama ket mangal-ala iti kurso a Bachelor of Secondary Education Major in Filipino ni Johnjacob ken maysa pay isuna a CTE Bulletin Journalist.
