LAOAG CITY – Naarestar ti maysa nga American Citizen iti Brgy. Darat iti ili ti Pinili babaen iti Warrantless Arrest gapu iti panaglabsingna iti Republic Act No. 10591 wenno ti Comprehensive Firearms and Ammunition Regulation Act.
Basar iti Philippine National Police iti nasao nga ili, nabigbig ti suspek nga agtawen ti 57, awanan asawa ken residente ti Brgy. Curtin, Sinait, Ilocos Sur.
Maibasar iti imbestigasion, napan nagresponde ti kapulisan kalpasan a nakaawatda ti report maipapan iti panagprobokar iti Brgy. Darat iti ili ti Pinili no sadino narekobreda ti Smith and Wesson revolver cal. 38 nga addaan ti maysa a bala manipod iti nasao a suspek.
Nadakamat iti naiwayat nga imbestigasion, kabayatan nga adda iti uneg ti pagtaenganda ni Patrolman Calvin Merine Vermudez a kameng ti PMFC INPPO a naka-off duty kadayta a gundaway ket nakangngeg ti putok ti paltog iti asideg iti balayda.
Gapu iti daytoy, dagus a rimmuar iti pagtaenganda ni Patrolman Vermudez ket dita a nakitana ti suspek a magmagna iti kalsada nga adda ti paltogna a nakabulsa iti akinkannigid a short pants daytoy rason a timmawag isuna iti Pinili Police Station tapno i-report iti nasao nga insidente.
Naammoan nga apaman a simmangpet dagiti duty personnel manipod iti protect box ket kinadua ni Patrolman Vermudez dagiti nagresponde a pulis iti maseknan a pagtaengan ket nakitada a nagtalinaed a nakabulsa ti paltog iti suspek.
Kabayatanna, ti suspek ket naipan iti kuerpo ti pulisia para iti naan-anay a dokumentasion ken umiso a disposion.
