LAOAG CITY – Nangipila ti counter-affidavit iti Department of Justice (DOJ) dagiti annak ti negosiante ken gaming tycoon a ni Charlie “Atong” Ang mainaig iti kaso dagiti mapukpukaw a mammallot.
Naglikudan dagiti annak ni Ang dagiti pammabasol a karaman dagitoy iti pannakapukaw dagiti mammallot ken inpettengda nga awan ti pangibasaran ken ebidensia dagiti alegasion nga inpila kontra kadakuada ti maipagarup a whistleblower a ni Julie “Dondon” Patidongan.
Segun iti abugadoda a ni Atty. Lorna Kapunan, napaay ni Patidongan a mangipaay ti umdas a pammaneknek kadagiti akusasion ken kurang ti testimoniana tapno ibilang nga addaan ti prima facie evidence wenno umdas a pangibasaran tapno ituloy ti kaso.
Inbatadna a naiget nga iramraman ni Patidongan ti pamilia Ang ken dagiti kakaduada tapno maisalakan ti bagina iti kaso a kidnapping a sangsangoenna iti Manila Regional Trial Court.
Inpettengna a ni Patidongan ti pudno nga adda ti pakainaiganna iti kaso banag a nakasaganada a paneknekan iti agtultuloy a preliminary investigation ti Department of Justice.
Mamati ti kampo ni Ang a makita ti Department of Justice ti kinaawan ti pangibasaran dagiti pammabasol ken saan nga agbayag ket naan-anay nga ibasura ti kaso.
Maipalagip nga iti napalabas a lawas, personal a nangipila ni Atong Ang ti bukudna a counter-affidavit ken kiniddawna kadagiti piskal nga isubli iti Philippine National Police – Criminal Investigation and Detection Group (PNP-CIDG) ti kaso tapno maminsan manen a maipadalan iti imbestigasion.
