LAOAG CITY – Naarestar ti maysa nga Auto Painter iti Anti-Illegal Drug Buy-bust Operation ditoy siudad ti Laoag.
Balligi a natiliw ti suspek babaen ti City Drug Enforcement Unit ti Laoag City Police Station.
Ti suspek ket agtawen ti 45, naasawaan ken residente ti Barangay 1, San Lorenzo ditoy siudad ti Laoag.
Natiliw ti suspek kalpasan a naglako ti maysa nga heat sealed transparent plastic sachet a naglaon ti maipagarup a shabu iti police poseur-buyer.
Nakumpiskar pay iti suspek ti maysa a pakete ti sigarilyo a naglaon ti maysa nga heat sealed transparent plastic sachet, maysa a ribu a pisos a nausar kas buy-bust money ken ti lima nga heat sealed transparent plastic sachet a naglaon ti maatap a shabu nga agdagsen ti 4.1 a gramo.
Naammoan nga agdagsen amin dagiti naala a maipagarup a shabu ti 4.6 a gramo.
Mainaig iti daytoy, maibilang ti suspek kas Street Level Individual no sadinno a naiget a naglikudanna a naglako daytoy ti iligal a droga.
Iti agdama, nagtalinaed iti pagbaludan ti suspek kabayatan a maisagsagana ti maipila a kaso kontra kenkuana gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
