LAOAG CITY – Inpakaammo ni Mr. Spider Rodas, ti Public Information Officer iti Northwestern University ditoy siudad ti Laoag nga adda ti napasamak nga indiscriminate firing iti nasao nga unibersidad.
Segun kenkuana, apaman a napasamak ti insidente ket dagus a naideklara ti pannaka-lockdown ti unibersidad ken naiyakar dagiti estudiante pakairamanan dagiti mangal-ala ti kurso a Nursing, Physical Therapy ken Medical Technology ken dadduma pay iti Ben A Nicolas Building a nakapasamakan iti pammaltog.
Nupay kasta, kunana a kalpasan ti sumagmamano nga oras ket nagsubli met laeng iti operasionda ken pinaigetanda ti seguridad kadagiti amin nga agad-adal ken empleado iti nasao nga unibersidad.
Inlawlawagna nga adda ti insigida nga inyuswastda nga emergency meeting maipapan iti nasao nga insidente kabayatan nga iyur-urayda pay laeng ti duktal iti imbestigasion dagiti otoridad.
Kunana a rumrummuar a maipagarup nga estudiante ti nagpaputok ti paltog ngem inpaimanan iti Philippine National Police ditoy siudad ti Laoag para iti naun-uneg nga imbestigasion.
Mainaig iti daytoy, inpakaammona nga adda ti pammilinda kadagiti amin a guardia iti unibersidad a mapaigetan ti panagkapkap iti panagruar ken panagserrek dagiti amin nga estudiante tapno saanen a maulit ti insidente.
Kabayatanna, iti agdama ket addan ti person of interest dagiti otoridad ken naikabil iti kuerpo ti pulisia para iti naan-anay nga imbestigasion.
