LAOAG CITY – Inlawlawag ni Police Col. Christopher Abrahano, provincial director iti Ilocos Norte Police Provincial Office ti maysa a pasamak iti Brgy. Barangubong, iti ili ti Nueva Era.
Kuna na nga awan ti napasamak a gulo iti detachment ti CAFGU ngem ketdi adda ti napasamak a pammaltog a nakairamanan dagiti dua a construction worker.
Segun kenni Abrahano, adayo ti detachment ti CAFGU iti nakapasamakan ti pammaltog.
Kuna na nga itay kallabes, a nakaapa ti maysa a construction worker nga agpapaay iti maar-aramid a dike iti nasao a barangay iti maysa a tao nga isu ti suspek ti pammaltog.
Nupay kasta, saan a masigurado ni Abrahano no agpapaay met laeng iti nasao a construction site ti suspek a pimmaltog.
Inpatalged na a saan met a nasugatan ti biktima a construction worker kalpasan ti pammaltog.
Saan a masigurado ni Abrahano no mano ti bilang ti putok ngem basar kadagiti residente nga agarup tallo dagiti nangeg da.
Nakarekobre da laeng ti maysa a kapsula ti 9mm a bala ti paltog.
Kinumpirmaran ni Abrahano a natiliwen ti suspek ken naipan iti PNP Nueva Era ken maisagsaganan dagiti maipila a reklamo kontra kenkuana.
Innayon na a taga Brgy. Nagrebcan, Badoc ti suspek nga asideg laeng iti Brgy. Barangubong, Nueva Era.
