LAOAG CITY – Naarestar ti maysa a babai babaen iti Entrapment Operation gapu iti panagtakaw ken grave coercion iti Brgy. Barani iti siudad ti Batac.
Basar iti Batac City Police Station, nabigbig ti biktima a naasawaan, agtawen iti 79 ken residente ti Brgy. Barani iti siudad ti Batac idinto a nabigbig met ti suspek a naasawaan, agtawen iti 51, awanan trabaho ken residente ti Brgy. Barani iti nasao met laeng a siudad.
Iti imbestigasion, dumawdawat ti suspek ti 22 a ribu a pisos iti biktima kas kasukat iti panangisublina ti tinakawna a paltog a Caliber 4.
Maibasar kadagiti otoridad, inkabil ti biktima ti paltogna iti console box ti luganna ngem saan a nagbayag ket nagpukaw.
Sakbay iti daytoy, kinuyog ti biktima ti suspek a mapan kitaen ti daga nga ilaklakona.
Iti sabali nga aldaw, timmawag ti suspek iti biktima nga adda ti nakakita ti paltogna ngem itedna laeng daytoy no agbayad ti 22 a ribu a pisos.
Mainaig iti daytoy, nagtulag ti biktima ken suspek nga agkitada iti Brgy. Lacub iti siudad ti Batac tapno iyawat ti kuarta.
Nupay kasta, nangiwayat dagiti otoridad ti Entrapment Operation a nangitunda ti pannakatiliw ti suspek.
Narekobre dagiti otoridad iti pagtaengan ti suspek ti maysa a caliber 45 pistol ARMSCOR, maysa a magazine, pito a live ammunitions ti caliber 45.
Iti agdama, maisagsagana dagiti kasapulan a dokumento a maipila kontra iti suspek.
