LAOAG CITY – Natay ti maysa a babai idinto a nasugsugatan dagiti dua a kakadwa na a nakalugan iti kurung-kurung iti napasamak a desgrasya iti paset ti Bolo Bridge ti Barangay Lanao, Bangui, Ilocos Norte.
Nabigbig ti natay a ni Gina Ventura y Rangasan, agtawen ti 51, naasawaan idinto a dagiti nasugatan ket da Jenifer Ventura y Semana, agtawen ti 38 ken ni Junjun Ventura y Rangasan, driver ti kurung-kurung, agtawen ti 34, naasawaan ken agpapada dagitoy a residente iti Barangay Poblacion Uno iti ili ti Pagudpud.
Inbatad ni Police Capt. Julius Basalio, chief of police iti ili ti Bangui nga iti imbestigasyon da, kabayatan nga agpapa-abagatan ti bus nga inturong ni Jerry Bayaca y Dicierto, agtawen ti 47, naasawaan ken residente iti Brgy. Fugu, Ballesteros, Cagayan ket nag-overtake ti sumarsaruno a motorsiklo nga inturong ni Neil Sherwin Antonio y Cabusas, agtawen ti 22, baro ken residente iti Barangay Malasin iti ili ti Bangui.
Iti panag-overtake ti motorsiklo iti bus ket nakadinnungpar na ti kurung-kurung nga agpaamyanan met a direksyon nga inturong ni Ventura.
Gapu iti daytoy, natennag ni Gina nga adda a mismo iti likud ti driver iti linya ti bus a nangitunda ti pannakapalidlid na ken napakarwan ti ulo na.
Agpapada a naitaray iti Bangui District Hospital dagiti biktima ngem naideklara a dead on arrival ni Gina.
Nagtalinaed met iti kustodyar ti PNP-Bangui ti driver ti bus ken ti motorsiklo.
Nakumpirmaran a ti nangiturong ti motorsiklo ket nabartek.
