LAOAG CITY – Natakawan ti balay ti maysa nga Overseas Filipino Worker (OFW) iti Purok Liwanag, Brgy. San Isidro iti ili ti Dumalneg.
Nabigbig ti agtagikua ti balay a ni Everlyn Daludado y Caldito, agtawen ti 33, OFW iti Hong Kong ken residente iti nadakamat nga ili.
Iti inisyal nga imbestigasyon, naripar ni Dennis Sison, Live-in partner ti OFW a nakalukat ti ridaw iti Comfort Room (CR) da ken nagbalaw idi nakita na a nakikir ti steel bar ti tawa.
Mamati ni Sison a ditoy a nagna dagiti saan pay a nabigbig a suspek ken rimuar da iti kusinada.
Iti panagturong dagiti aglive-in partner iti uneg ti kwarto da ket ditoy a nakita da dagiti agkaiwarang a badbado da ken mapukpukaw ti backpack ti OFW.
Naipalaon iti bag ti OFW ti pasaporte na, Hongkong Identity Card manipod iti Hongkong Immigration, OFW Visa, Plane Ticket, kwarta a 1,850 a pisos,100 Hongkong Dollar, maysa a pares ti aritos, maysa a relo, maysa a kwentas nga agbalor ti 15 a ribo a pisos, maysa nga S6 samsung cellular phone nga agbalor ti 9,500 a pisos, maysa a samsung S3 nga agbalor ti 5,300 a pisos, Sony Ericson E nga agbalor ti 3,300 a pisos, Western Union Card, ATM Card Bank of China ken Octopus Card.
Kabayatanna, immapela ti OFW a ni Everlyn Daludado iti Purok Liwanag, Brgy. San Isidro iti ili ti Dumalneg kadagiti napan nagtakaw iti balayda nga isubli da koma dagiti napapateg a dokumento na kas ti pasaporte, plane ticket, Hongkong ID, Octopus ID ken dadduma pay.
Inbatad na nga uray saanen a maisubli ti cash, cellphones, alahas ken dadduma a banag nga intaray dagiti mannanakaw basta maisubli dagiti kasapulan na a dokumento para iti panagsubli na idiay Hongkong.
Iti eksklusibo nga interview ti Bombo Radyo Laoag, kuna na a simmangpet laeng idi Agosto 10 ken agsubli koma idiay Hongkong intono Setyembre 3 ita a tawen.
Inadmitir na a sakbay a nagidda da ket adda dagiti agtagtaguob nga aso iti asideg ti balayda ngem saanda nga inkaso ta inpagarop da a gagangay laeng daytoy.
Innayon na a ti kwarto a nangipanan na kadagiti gamit na ket awan ti mangus-usar ken ditoy na nga inkabil tapno al-alisto ti panagsapol na kadagiti kasapulan na.
Inpasingked na nga awan pulos ti pamal-palatpatan da no siasinno ti simrek iti balayda ken saanda a kayat ti basta agitudo.
Kabayatanna, inbatad ni Daludado nga addan dagiti nangbalakad kenkuana no ania dagiti rumbeng nga aramiden na tapno makaala ti sukat ti pasaporte na ken makasubli met laeng idiay Hongkong.
Inbatad met ni Police Lt. Joel Corales, ti chief of police iti ili a Dumalneg a possible nga ubing wenno bassit ti bagi ti simrek iti balay da Everlyn Daludado iti Barangay San Isidro iti nadakamat nga ili.
Daytoy ket basar iti nakita da a possible a nagnaan a simrek ti mannanakaw.
Kuna na a mabalin nga ubing wenno narapis a tao ti simrek ken adda dagiti kakadwa na a nangbayabay kenkuana a simrek iti nasao a balay.
Inpakaammo pay ti opisyal iti eksklusibo nga interview kenkuan ti Bombo Radyo Laoag, apaman a naipakaammo kadakuada ti napasamak ket dagus da a napan iti lugar ken naginterview da kadagiti residente kadwa da dagiti opisyal ti barangay iti nadakamat a lugar.
Kinumpirmaran pay ni Corales nga adda dagiti ubbing nga inimbitaran da a binayabay dagiti nagannak kadakuada ngem inpasingked da nga awan ti ammo da iti napasamak.
Pinaneknekan met dagiti nagannak dagiti ubbing a saan a rimrimuar dagiti annak da iti dayta nga oras a pannakapasamak ti panagtatakaw.
Iti agdama, agtultuloy ti naiget nga imbestigasyon ti PNP-Dumalneg mainaig iti daytoy a pasamak.
