LAOAG CITY – Sinerrek ti danum ti baybay ti naruay a pagtaengan nga adda iti asideg ti baybay iti Northshore idiay Hawaii.
Segun ken ni Bombo International Correspondent Manny Pascua, daytoy ket gapu iti bigla nga idadakkel ti allon ti baybay a maiyarig a bantay.
Kuna na a dati-datin a makakitkita dagiti residente iti nasao a lugar iti dadakkel nga allon ti baybay gapu ta surfing capital ti nasao nga isla, ngem sabsabli ti nakita da itay bigat gapu ta umabot ti 40 agingga iti 45 a kadapan ti kadakkel na.
Daytoy ti rason no sapay a ti Division of Ocean Safety Lifeguard Services ket kasapulan a mangiwayat da iti agarup 34 a rescue operations ken apagapaman a naserran Waimea Beach Park gapu iti nasao a pasamak.
Awan met ti makaibaga no ania ti makagapu iti panagdakkel ti allon ti baybay ngem adda iti immun-unan a naiparuk-at a report nga addanto pannakapasamak ti panagdakkel ti danum ti baybay idiay Hawaii gapu iti “climate change”.
Kabayatan na, nangitunda met ti sumagmamano nga oras a panagbekkel ti trapiko ti Like-Like Highway iti nasao pay lang nga isla kalpasan a dua a lugan ti natupakan ti kayo.
Nupay kasta, awan ti naipakaamo a nadangran ken insigida met la nasulbar ti nasao a problema babaen ti Dept. of Highways.
